„ჭაჭის ფესტივალის“ პროგრამა

     „ჭაჭის ფესტივალი“ – 3 ნოემბერი, 2018 წელი. თელავი

     ფესტივალის პროგრამა

      საქართველოს კულტურის პალატის ინიციატივით და საქართველოს ტურიზმის ეროვნული ადმინისტრაციის მხარდაჭერით, 2018 წლის 3 ნოემბერს,  ქალაქ თელავში გაიმართება ყოველწლიური  „ჭაჭის ფესტივალი“.

     ფესტივალის ჩატარების აუცილებლობა გამოიწვია იმ გარემოებამ, რომ ბოლო წლებში საქართველოში შემოსულ უცხოელ ტურისტებს ძალიან აინტერესებთ საქართველოს სხვადასხვა კუთხის მრავალსაუკუნოვანი ისტორია, ქართველი ხალხის ყოფითი საკითხები, ტრადიცია, ზნე-ჩვეულებები და რიტუალები. ამ მხრივ ძალზედ საინტერესო და მრავალფეროვანია კახეთის მხარე. ფესტივალზე  გაცოცხლდება შუა საუკუნეების კახეთში არსებული ეთნოგრაფია, ყოფა-ცხოვრება და ჩვეულებები.

     „ჭაჭის ფესტივალი“ მოიცავს მცირე თეატრალიზებულ წარმოდგენებს, რომლებიც გააცოცხლებს XVIII საუკუნის კახეთს, მის ეთნოგრაფიას, ტრადიციას და რიტუალებს. კონკრეტულად კი კახელი გლეხების ურთიერთდამოკიდებულებას, კახეთის სხვადასხვა სოფლებიდან ჩამოსული გლეხების მიერ ჭაჭის გამოხდის  პროცესს;

     ფესტივალში მონაწილეობას მიიღებენ ქართული ჭაჭის მწარმოებელი კომპანიები;

     გაიმართება დიდი კახური „ზაოდობა“, რომელშიც მონაწილეობის მიღება შეეძლება თითოეულ ტურისტს სურვილისამებრ.

     ჭაჭის გამოხდასთან ერთად დაამზადებენ კახურ ტრადიციულ კერძებს;

     გაიმართება კახური ბაზრი, თავისი კოლორიტული  თავისებურებებით – XVIII საუკუნის კახეთისთვის დამახასიათებელი ეპოქალური ნივთებით, ინვენტარით, კოსტიუმებით, ჭურჭლით და რეკვიზიტით.

     12-00 საათიდან 17-00 საათამდე – ფესტივალს წარუძღვებიან საქართველოში ცნობილი პიროვნებები, რომლებიც ცალკ-ცალკე წარმოაჩენენ თითოეულ გლეხს, მის მიერ წარმოდგენილ ჭაჭას, თავისი პატარა საიდუმლოებებით.

     მთელი დღის მანძილზე ფესტივალის მსვლელობას დაამშვენებენ კახური ფოლკლორული ჯგუფები ტრადიციული კახური მრავალხმიანი სიმღერებით და კაფიებით.

     ამ ფორმატში გაცოცხლებული კახეთი ძალიან საინტერესო იქნება არა მხოლოდ უცხოელი სტუმრებისა და ტურისტებისთვის, არამედ საქართველოს მოქალაქებისთვისაც.

     ფესტივალზე იმუშავებს ჟიური ორი შემადგენლობით: პირველი ჟიური შეაფასებს კახეთის სხვადასხვა სოფლიდან ჩამოსული გლეხების გამოხდილ ჭაჭას; მეორე ჟიური შეაფასებს ჭაჭის მწარმოებელი კომპანიების მიერ გამოხდილ ჭაჭას;

     ფესტივალის დასასრულს 17-00 საათზე გაიმართება ჟიურის მიერ გამოვლენილი გამარჯვებულების დაჯილდოება;

     დაჯილდოების პროცესს მუსიკალურად გააფორმებს თბილისის საკონცერტო ორკესტრი „ბიგ ბენდი“,  გაიმართება  ქართული ესტრადის ცნობილი წარმომადგენლების კონცერტი.

          ფესტივალის მიზანია ქართულ ნატურალურ პროდუქტს – ყურძნის ბრენდს „ჭაჭა“-ს – გაუწიოს მეტი პოპულარიზაცია,  გააცნოს ამ ნატურალური ქართული პროდუქტის ისტორია, მისი სასარგებლო თვისებები და შეაყვაროს იგი.

          „ჭაჭის ფესტივალი“ გაიმართება Check in Georgia ფარგლებში.

მოწვეული სტუმრები ფესტივალის დაწყებისთანავე ჩაერთვებიან ყველა ზემოთ ჩამოთვლილ აქტივობებში ღონისძიების წამყვანებთან ერთად – კერძოდ,

  • მონაწილეობას მიიღებენ სოფლებიდან ჩამოსულ თითოეულ გლეხთან ერთად ჭაჭის გამოხდის პროცესში;
  • დააგემოვნებენ კომპანიების მიერ წარმოდგენილ ჭაჭას;
  • ჭაჭის დეგუსტაციასთან ერთად, კახური მასპინძლობის გათვალისწინებით დააგემოვნებენ იმ კახურ კერძებს, რომლებიც უხდება ჭაჭას;
  • გაეცნობიან კახური კოლორიტული ბაზრის თავისებურებებს, იქ წარმოდგენილ სურსათ-სანოვაგეს;
  • ფესტივალის დასასრულს – დაჯილდოების ცერემონიის დროს და კონცერტზე ექნებათ საუკეთესო ადგილები;
  • ფესტივალის დასკვნით კონცერტზე გამორჩეულ ტურისტებს ორგანიზატორებისგან ელოდებათ სიურპრიზები.

 

ფესტივალის დამფუძნებელია საქართველოს კულტურის პალატა

პრეზიდენტი – დავით ოქიტაშვილი